SERVIR OS RICOS

Detrás das fachadas de luxosos edificios parisienses, das inmensas portas dos castelos, dos vans de vastas vilas na Costa Azul, agóchase un persoal invisible pero presente a diario ao servizo das grandes fortunas. Amas de chaves, mordomos, camareiras, lavandeiras, cociñeiros e choferes traballan da mañá á noite, e moitas veces tamén de noite, para satisfacer as necesidades e desexos dos millonarios que os empregan nas súas casas.

Como resultado dunha investigación sociolóxica inmersiva ao longo dos anos, Alizée Delpierre amósanos a «explotación dourada» do servizo doméstico dos grandes ricos, necesaria para consolidar o seu poder e manter os seus privilexios de clase.

Alizée Delpierre é socióloga, especializada en servidume, explotación laboral e grandes fortunas. É autora de Servir les riches (2022), Les domesticités (2023) e coeditou a obra colectiva Les femmes de ménage dans l’intimité du domicile (2023). Dende hai varios anos codirixe o seminario «DomesticitéS» (Printemps/Irisso), dedicado a reflexionar sobre os temas que rodean o traballo doméstico. A súa investigación centrouse tamén nas políticas públicas de reincorporación ao traballo na era da dixitalización dos servizos públicos.